Conor McGregor var valinn bardagamaður ársins af Fighters Only tímaritinu í gær. McGregor gat ekki verið viðstaddur afhendingunni en sendi þess í stað áhugaverða myndbandskveðju.
McGregor byrjaði á að biðjast afsökunar á fjarveru sinni enda er hann upptekinn við að undirbúa sig fyrir bardagann gegn Rafael dos Anjos í mars.
Það leið ekki á löngu þar til McGregor byrjaði að drulla yfir einhvern og ekki var það næsti andstæðingur hans, Rafael dos Anjos. McGregor beindi athyglinni sinni þess í stað að æfingafélaga dos Anjos, þungavigtarmeistaranum Fabricio Werdum.
„Þungavigtarmeistarinn er ræfill sem getur ekki barist að því hann er með smá eymsli á tá. Hvernig getur þungavigtarmeistarinn hætt við að berjast að því hann er með eymsli á tá? Hvers konar meistari gerir það?“
Fabricio Werdum átti að berjast í kvöld við Cain Velasquez á UFC 196 en báðir drógu sig úr bardaganum. Bardagakvöldið var því breytt úr „Pay Per View“ kvöldi í bardagakvöld á Fox Sports 1 rásinni og heitir ekki lengur UFC 196. Werdum er þó ekki með smávægileg eymsli í tánni eins og McGregor heldur fram.
McGregor baðst svo aftur velvirðingar á fjarveru sinni og lauk svo ræðunni á „takk fyrir og þakkið mér.“
Ræðuna má sjá hér að neðan.
