Samkvæmt ESPN mun Gunnar Nelson mæta Leon Edwards í London þann 16. mars. Bardaginn yrði næstsíðasti bardagi kvöldsins en aðalbardagi kvöldsins virðist einnig verið staðfestur.
Þetta segir Brett Okomoto hjá ESPN en hann er mjög áreiðanlegur. Okomoto hefur þetta frá sjálfum Dana White, forseta UFC.
Breaking: Leon Edwards vs. Gunnar Nelson will co-headline UFC Fight Night on March 16 in London on ESPN+, per Dana White. pic.twitter.com/U1q0FbFnrK
— Brett Okamoto (@bokamotoESPN) January 16, 2019
MMA Fréttir getur staðfest frásögn Okomoto.
Þetta er afar flottur bardagi í veltivigtinni enda báðir á topp 15 styrkleikalistanum í UFC – Gunnar í því 12. og Edwards í því 10. Edwards hefur verið á góðu skriði en hann hefur unnið sex bardaga í röð. Samtals er Edwards 8-2 á ferli sínum í UFC og vann síðast Donald Cerrone í júní.
Gunnar Nelson snéri aftur eftir langa fjarveru þegar hann kláraði Alex ‘Cowboy’ Oliveira í desember í fyrra. Gunnar lýsti því yfir eftir bardagann að hann vildi berjast aftur sem fyrst og var með augun á bardagakvöldinu í London. Gunnar talaði um hnémeiðsli sem hann varð fyrir í aðdraganda bardagans gegn Oliveira en hann fór í myndatöku á dögunum og leit hnéð vel út þar. Nú virðist hann hafa fengið bardaga eins og hann vildi og er um hörku bardaga að ræða!
Eins og áður segir verður þetta næstsíðasti bardagi kvöldsins en í aðalbardaga kvöldsins mætast þeir Darren Till og Jorge Masvidal samkvæmt Okomoto.
Bardagakvöldið fer fram í The O2 Arena í London þann 16. mars.
