![](https://i0.wp.com/mmafrettir.is/wp-content/uploads/2020/11/deiveson-figueiredo-brandon-moreno-ufc-256.jpg?resize=696%2C464&ssl=1)
Deiveson Figueiredo hefur ekki miklar áhyggjur af vigtuninni fyrir UFC 256 um helgina. Figueiredo segist vera í toppmálum núna og muni auðveldlega ná vigt.
UFC 256 fer fram á laugardaginn þar sem Deiveson Figueiredo mætir Brandon Moreno. Stutt er síðan Figueiredo barðist síðast og hafa verið á kreiki efasemdir um hvort hann geti náð vigt tvisvar á aðeins þremur vikum. Niðurskurðurinn er erfiður fyrir Figueiredo en honum mistókst að ná vigt fyrir fyrri titilbardaga sinn gegn Joseph Benavidez.
Í samtali við fjölmiðla í gær sagðist Figueiredo ekki hafa neinar áhyggjur af niðurskurðinum. Figueiredo sagðist vera 60 kg í gær, tveimur dögum fyrir vigtunina, en hann þarf að vera 56,69 kg eða minna á föstudaginn.
„Ég gæti jafnvel náð vigt í dag [miðvikudag] eða á morgun. Ég vil bara sýna að ég geti náð tilsettri þyngd. Ég get haldið mér í þessari þyngd síðustu vikuna fyrir bardagann,“ sagði Figueiredo við fjölmiðla í gær.
Figueiredo hélt þyngdinni sinni niðri í aðdraganda bardagans en hann gengur vanalega um í kringum 66-67 kg en fyrir þennan bardaga hefur hann verið í kringum 61-62 kg. Figueiredo er síðan um 65 kg þegar hann stígur í búrið á keppnisdag.