UFC og Georges St. Pierre hafa náð samkomulagi og er St. Pierre nálægt því að undirrita nýjan samning. Gamli meistarinn virðist því vera á leið aftur í búrið en frá þessu greinir Ariel Helwani.
Georges St. Pierre (GSP) hætti í MMA sem veltivigtarmeistari UFC árið 2013. Síðasta árið hefur hann viljað koma aftur en ekki náð samkomulagi við UFC. GSP hélt því fram að hann væri samningslaus og hótaði að fara í viðræður við önnur bardagasamtök.
Núna er hann á barmi þess að rita undir nýjan nokkurra bardaga samning við UFC. Samningaviðræður hafa staðið yfir í nokkra mánuði og hafa báðir aðilar komist að samkomulagi samkvæmt frétt MMA Fighting.
Ekki er vitað hvenær GSP muni snúa aftur en UFC áætlar að það verði á þriðja ársfjórðungi þessa árs.
GSP hefur verið orðaður við bardaga við millivigtarmeistarann Michael Bisping og þá er aldrei að vita nema hann snúi aftur í veltivigtina.
