Renzo Gracie ætlar að snúa aftur í búrið í júlí. Renzo mun mæta Yuki Kondo á ONE Championship bardagakvöldi í Filippseyjum.
Hinn 51 árs Renzo Gracie (13-7-1) hefur ekki barist síðan hann tapaði fyrir Matt Hughes í apríl 2010 á UFC 112. Bardaginn var einhliða en það reyndist vera fyrsti og sennilega eini UFC bardagi Renzo á ferlinum. Renzo barðist lengst af í Pride í Japan en bardaginn þann 27. júlí fer fram í millivigt.
Yuki Kondo er sjálfur 42 ára en er búinn með 103 MMA bardaga! Hann barðist síðast í desember og hefur verið duglegur að keppa í MMA síðan 1996.
Renzo Gracie er einn af frumkvöðlunum í MMA og rekur einn færasta jiu-jitsu klúbb heims, Renzo Gracie Academy. Hann hefur lengi talað um að vilja berjast aftur í MMA og er nú loks að láta verða að því.
