Ragnhildi Gyðu Magnúsdóttur var nýlega boðið að keppa við Gabi Garcia í japönsku bardagasamtökunum Rizin FF. Ragnhildur var ekki lengi að hafna boðinu.
Ragnhildur Gyða keppir í vaxtarrækt og aflraunum og hefur unnið til fjölda verðlauna í þeim greinum. Ragnhildur á nokkur Íslandsmet í kraftlyftingum og vann bæði titilinn Sterkasta kona Íslands 2013 og Járnkonan 2014.
Ragnhildur fékk skilaboð í síðustu viku frá manni sem sagðist vera að leita að andstæðingum fyrir Gabi Garcia í MMA. Maðurinn sagðist vera að vinna fyrir Rizin FF í Japan en bardagasamtökin voru sett á laggirnar í fyrra. Allir þrír bardagar Gabi hafa farið fram í Rizin og hefur hún sigrað þá alla.
Ragnhildur vissi ekki hver Gabi Garcia var og var ekki lengi að hugsa sig um hvort hún ætti að taka bardagann. „Það var nú bara HELL NO á sekúndunni. Í fyrsta lagi hef ég aldrei á ævinni æft neinar bardagaíþróttir og lenti síðast í slag að mig minnir þegar ég var í 5. bekk,“ segir Ragnhildur.
Bardaginn hefði átt sér stað í Japan en næstu bardagakvöld Rizin fara fram í lok desember „Upphæðin fyrir þetta þyrfti allavega að vera ansi há til að maður myndi mögulega íhuga þetta og að allt yrði borgað undir mann – flug, matur, gisting og samgöngur. Þar fyrir utan er ég alls ekki með besta nefið í svona lagað – voldugt kónganef sem er alveg grjóthart fram í nefbrodd.“
Gabi Garcia er ein besta gólfglímukona heims en hún er margfaldur heimsmeistari í brasilísku jiu-jitsu. Hún hefur nýlega snúið sér að MMA en konur í hennar þyngdarflokki eru ekki á hverju strái. „Eftir að hafa svo heyrt að hún sé 111 kg og 186 cm á hæð að þá var það enn meira HELL NO. Þetta yrði svona Davíð vs. Golíat þar sem ég er bara 168 cm á hæð og rétt tæplega 80 kg á góðum carb-up degi. En má svo sem alveg taka þessu sem hrósi ef gaurinn hélt í alvörunni að ég væri 110+ kg.“
Skilaboðin frá Rizin má sjá hér að neðan.
