Kelvin Gastelum er sagður hafa fallið á lyfjaprófi sem tekið var kvöldið sem hann barðist við Vitor Belfort. Leifar af marijúana fundust í lyfjaprófinu.
Kelvin Gastelum mætti Vitor Belfort í Brasilíu þann 11. mars og sigraði með tæknilegu rothöggi í 1. lotu. Gastelum var tekinn í lyfjapróf sama kvöld og hefur USADA, sem sér um lyfjamál UFC, látið Gastelum vita af mögulegu broti hans. Í lyfjaprófi hans fannst Carboxy-THC sem er myndefni marijúana og/eða hass. Magnið sem fannst var yfir 180 ng/mL leyfilegu magni.
Gastelum átti að mæta Anderson Silva á UFC 212 þann 3. júní. Nú hefur sá bardagi verið felldur niður og leit hafin að nýjum andstæðingi fyrir Anderson Silva samkvæmt MMA Fighting. Yoel Romero hefur boðist til að mæta Anderson en aðeins ef bardaginn er upp á bráðabirgðartitil í millivigtinni.
Per his team, @YoelRomeroMMA is willing to to fight Anderson Silva on 6/3 … if it’s for an interim belt. No belt, no interest.
— Ariel Helwani (@arielhelwani) April 6, 2017
Þar sem bardaginn fór fram í Brasilíu mun CABMMA (brasilíska MMA sambandið) ákvarða refsingu Gastelum í samstarfi við USADA. USADA mun rannsaka málið nánar áður en refsing verður ákvörðuð en sem stendur hefur Gastelum verið settur í tímabundið bann.
