Khabib Nurmagomedov getur ekki barist á morgun á UFC 209. UFC staðfesti rétt í þessu að hann geti ekki barist og var hann sendur upp á spítala.
Nurmagomedov hefur átt í erfiðleikum með niðurskurðinn og snemma á föstudagsmorgni (5:30) var hann sendur upp á spítala vegna veikinda. Hann átti að berjast við Tony Ferguson annað kvöld á UFC 209. Bardaginn átti að vera næst síðasti bardagi kvöldsins og ríkti gríðarleg spenna fyrir bardaganum.
Khabib fékk meðhöndlun á spítalanum vegna vandamála tengt niðurskurðinum og bardaginn blásinn af samkvæmt læknisráði.
Þetta er í þriðja sinn sem bardagi þeirra Khabib og Tony Ferguson er blásinn af. Fyrst í desember 2015, svo í apríl 2016 og núna í mars 2017.
Khabib hefur einu sinni áður verið í vandræðum með niðurskurðinn en fyrir bardaga hans gegn Abel Trujillo árið 2013 náði hann ekki vigt.
UFC er nú að leita að andstæðingi fyrir Tony Ferguson og hefur Michael Johnson verið nefndur til sögunnar.
