Kolbeinn Kristinsson er kominn á samning hjá Salita Promotions í Bandaríkjunum. Kolbeinn berst sinn fyrsta bardaga í Bandaríkjunum þann 17. janúar.
Kolbeinn Kristinsson (11-0) hefur keppt sem atvinnumaður í boxi í nokkur ár. Hann og Valgerður Guðsteinsdóttir (4-2) eru einu íslensku atvinnumennirnir í boxi.
Kolbeinn hefur átt í erfiðleikum með að fá bardaga síðustu ár en hann hefur bara fengið einn bardaga á ári síðustu þrjú ár. Með samningnum við Salita Promotions vonast Kolbeinn eftir að fá fleiri bardaga.
„Ég vonast til að berjast eins mikið og ég get og halda áfram að þróast. Stærsta hindrunin á mínum vegi hefur verið skortur á bardögum,“ segir Kolbeinn við Ring vefinn.
Í fyrsta bardaganum hjá Salita Promotions berst Kolbeinn við Tristan James (3-3-2) í þungavigt. Bardaginn fer fram í Sloan í Iowa en í aðalbardaga kvöldsins mætast þeir Vladimir Shishkin og Ulises Sierra.
Kolbeinn hefur undanfarið ár æft mikið hjá Javan ‘Sugar’ Hill í Kronk Gym í Detroit. Kolbeinn fór til Bandaríkjanna á dögunum og verður þar fram að bardaganum.
