UFC var með bardagakvöld í Mexíkó í gær sem fór ekki eins og vonir stóðu til. Aðalbardaginn var stöðvaður eftir aðeins 15 sekúndur og var dæmdur ógildur.
Þeir Yair Rodriguez og Jeremy Stephens mættust í aðalbardaganum í Mexíkóborg. Eftir aðeins 15 sekúndur í 1. lotu varð Stephens fyrir augnpoti. Gera þurfti hlé á bardaganum en eftir fimm mínútur gat Stephens ekki enn opnað augað. Bardaginn var þar af leiðandi dæmdur ógildur þar sem Stephens gat ekki haldið áfram.
Rodriguez var ósáttur en áhorfendur í Mexíkóborg voru æfir. Rusli og aðskotahlutum var kastað í Stephens í búrinu og var farið með hann strax úr búrinu. Á leið úr búrinu héldu áhorfendur áfram að kasta hlutum í hann.
Stephens fékk djúpa skrámu og slæmt mar á vinstra augað eftir augnpotið. Stephens lagði til að þeir myndu mætast aftur eftir nokkrar vikur þegar hann væri búinn að jafna sig.
Þetta var óheppilegur endir á bardaganum en Stephens dvaldi í 6 vikur í Mexíkóborg í undirbúningi sínum fyrir bardagann til að venjast loftslaginu.
