Það er ekki oft sem tækni úr fjölbragðaglímunni sést í MMA. Eitt slíkt uppgjafartak lét þó sjá sig um helgina þegar Jonno Mears kláraði bardaga með „Boston krabbanum“ svo kallaða.
Jonno Mears mætti Aaron Jones um helgina í Manchester, Englandi. Mears fylgdist vel með WWE fjölbragðaglímunni sem krakki og náði afar óhefðbundnu uppgjafartaki beint úr WWE gegn Jones.
Boston krabbinn er þekkt tak úr fjölbragðaglímunni (glíman sem er leikin) en þetta er líklegast í fyrsta sinn sem einhver nær þessu í MMA.
„Ég stökk á bakið á honum og þá datt mér í hug að taka krabbann. Ég ætlaði að fara í ‘mount’ en ég sá að hann var að verja sig þannig að ég ákvað að prófa krabbann. Ég var steinhissa að ég skyldi hafa náð taki á löppunum,“ sagði Mears við MMA Fighting eftir bardagann.
Mears segir að hann hafi stundum leikið sér með þetta á æfingum en aldrei áður reynt þetta í bardaga. Mears er 2-0 sem atvinnumaður á ferlinum en uppgjafartakið má sjá hér að neðan.
