UFC er með sitt fyrsta bardagakvöld í Tékklandi í kvöld. Í aðalbardaga kvöldsins mætast þeir Jan Blachowicz og Thiago Santos en hér eru nokkrar ástæður til að horfa á bardagakvöldið.
Tvær sleggjur
Bardagakvöldið er hreint út sagt ekki upp á marga fiska en aðalbardagi kvöldsins er samt geggjaður. Þeir Jan Blachowicz og Thiago Santos eiga ekki flekklausan feril í MMA en hafa verið á góðu skriði undanfarið. Eftir að hafa verið í miklu miðjumoði hefur Blackowicz skyndilega unnið fjóra bardaga í röð og sýnt mjög skemmtileg tilþrif. Thiago Santos er með 10 sigra eftir rothögg í 12 sigrum í UFC og hefur litið vel út eftir að hann fór upp í léttþungavigt. Síðasti bardagi hans gegn Jimi Manuwa var rosalegur og hvetjum við alla til að rifja hann upp snöggvast. Þetta gæti því orðið mjög skemmtilegt stríð í léttþungavigt.
Engin miskunn fyrir þá gömlu
Petr ‘No Mercy’ Yan er einn af þeim allra efnilegustu í bantamvigt UFC í dag. Þessi 26 ára fyrrum bantamvigtarmeistari ACB hefur unnið alla þrjá bardaga sína í UFC, klárað tvo af þeim og ekki lent í neinum teljandi vandræðum. Ef fram heldur sem horfir verður hann kominn í titilbaráttuna innan skamms. Hann mætir John Dodson sem er orðinn 34 ára gamall og hefur verið skuggalega leiðinlegur í síðustu fimm bardögum sínum. Dodson verður samt áhugavert próf fyrir Yan og spurning hvernig sá eldri stendur sig gegn þeim yngri.
Góður tími
Eins og áður segir fer bardagakvöldið fram í Prag í Tékklandi og eru bardagarnir því á besta tíma hér heima. Fyrsti bardagi kvöldsins hefst kl. 16:00 en aðalhluti bardagakvöldsins hefst kl. 19:00 og eru allir bardagarnir aðgengilegir á Fight Pass rás UFC á Íslandi.
Nóg af efnilegum bardagamönnum
Einhvers staðar þurfa menn að byrja þegar þeir fá samning við UFC og er það oft raunin um þessi minni bardagakvöld. Það eru á kvöldinu nokkrir bardagamenn sem eru efnilegir og að taka sín fyrstu skref í UFC sem gæti verið gaman að fylgjast með í framtíðinni. Einn af þeim er Ismail Naurdiev (17-2) sem er 22 ára gamall Austurríkismaðu og hefur unnið 11 bardaga með rothöggi. Hann fær reyndar erfitt verkefni í kvöld en hann tekur á móti Michel Prazeres sem hefur unnið átta bardaga í röð í UFC.
Damir Ismagulov (17-1) berst sinn 2. bardaga í UFC í kvöld þegar hann tekur á móti Joel Alvarez (15-1). Báðir eru á besta aldri en Alvarez hefur aldrei farið allar loturnar í 16 bardögum og klárað 14 bardaga með uppgjafartaki.
