Stephen Thompson var svekktur með niðurstöðu bardaga síns gegn Tyron Woodley í nótt. Thompson hélt hann hefði gert nóg til að sigra bardagann en viðurkennir að hann hefði getað gert meira.
„Ég hefði getað verið aggressívari, en ég hélt að ég hefði gert nóg til að vinna bardagann. Ég reyndi að taka hann í sundur, vera hreyfanlegur. Þú getur ekki staðið fyrir framan Tyron Woodley án þess að hafa áhyggjur af hægri höndinni hans eða fellunum hans,“ sagði Thompson.
Á blaðamannafundinum eftir bardagann taldi Thompson sig hafa unnið þrjár lotur en setur skuldina á sig fyrir að láta bardagann fara í dómaraákvörðun.
