Stjúpdóttir þungavigtarmannsins Walt Harris er ennþá týnd. Walt Harris hefur þar af leiðandi hætt við komandi bardaga gegn Alistair Overeem í desember.
19 ára stjúpdóttir Walt Harris, Angela Harris, hefur verið týnd síðan 24. október. Hvarf hennar er rannsakað sem glæpur og er talið að hún hafi verið brottnumin. Bíll hennar fannst 55 mílum frá skóla hennar en sönnunargögn í bílnum benda til að ráðist hafi verið á stúlkuna.
Umbun hefur verið lofað fyrir upplýsingar sem gæti leitt til handtöku eða sakfellingar. Ríkisstjórinn í Alabama lofaði 5.000 dollurum en síðar hafa Jon Jones, Dana White og Ali Abdelaziz lagt til 25.000 dollara hver. Umbunin er því komin í 100.000 dollara en málið hefur vakið mikla athygli í Alabama.
Walt Harris átti að mæta Alistair Overeem í aðalbardaga kvöldsins þann 7. desember. Harris hefur skiljanlega dregið sig úr bardaganum og er UFC að leita að andstæðingi fyrir Overeem.
