79. þáttur Tappvarpsins er kominn út. Í þættinum ræddum við um algjört hrun Chris Weidman, möguleika Dominick Reyes gegn Jon Jones og fleira.
Dominick Reyes sigraði Chris Weidman með rothöggi í 1. lotu um síðustu helgi. Þetta var fimmta tap Weidman í síðustu sex bardögum en öll töpin voru eftir rothögg. Reyes gæti fengið titilbardaga með sigrinum og mætt Jon Jones en Reyes hefur litið frábærlega út síðan hann kom í UFC.
Bardagi Greg Hardy gegn Ben Sosoli um síðustu helgi var dæmdur ógildur eftir að Hardy notaði úðatæki á milli lotna. Hardy vill meina að hann hafi fengið leyfi til að nota úðatækið en íþróttasambandið í Massachusetts segir að hann hafi ekki haft leyfi til þess.
Þá fórum við einnig vel yfir bardaga Ben Askren gegn Demian Maia sem fer fram á laugardaginn og bardagakvöldið í Singapúr. Nauðgunarásakanir á hendur Conor McGregor voru einnig ræddar.
