Þrír stórir titilbardagar eru sagðir staðfestir í sumar hjá UFC. Jon Jones og Amanda Nunes munu verja titlana sína í júlí og þá verður barist um lausan bantamvigtartitil í júní.
T.J. Dillashaw var á dögunum sviptur bantamvigtartitli sínum eftir að hann féll á lyfjaprófi. Nú hefur UFC staðfest að Henry Cejudo fái séns á sínum öðrum titli en hann mætir Marlon Maroes í júní Á UFC 238. Cejudo er fluguvigtarmeistari og sigraði Dillashaw í janúar í hans fyrstu titilvörn. Cejudo getur því orðið tvöfaldur meistari takist honum að sigra Marlon Moraes í bantamvigt en bardaginn fer fram þann 8. júní og verður aðalbardagi kvöldsins. Moraes er áskorandi nr. 1 í bantamvigtinni eftir fjóra sigra í röð gegn John Dodson, Aljamain Sterling, Jimmie Rivera og Raphael Assuncao. Sama kvöld mun Valentina Shevchenko verja fluguvigtartitil sinn gegn Jessicu Eye.
Þann 6. júlí fer International Fight Week fram þar sem hápunkturinn verður UFC 239. Í aðalbardaga kvöldsins mun Jon Jones mæta Thiago Santos um léttþungavigtartitilinn. Jones ýjaði að því í gær á Twitter að hann og Stipe Miocic myndu mætast en nú er ljóst að það verður önnur titilvörn í léttþungavigt næst hjá Jones.
I don’t think you guys are ready to witness @stipemiocic and I, would July give you all enough time?
— Jon Bones Jones (@JonnyBones) March 27, 2019
Sama kvöld mun Amanda Nunes verja bantamvigtartitil sinn þegar hún mætir Holly Holm. Nunes varð fyrsta konan til að verða tvöfaldur meistari með svakalegum sigri á Cris ‘Cyborg’ Justino í desember. Hún er því bantamvigtar- og fjaðurvigtarmeistari UFC og verður þetta hennar fyrsti bardagi eftir að hún varð tvöfaldur meistari. UFC hefur ekki staðfest bardagana á UFC 239 en bæði ESPN og MMA Fighting hafa staðfest bardagana.
