Veltivigtarmeistarinn Tyron Woodley er afar ósáttur við ummæli Dana White eftir bardaga hans um helgina. Woodley vill opinbera afsökunarbeiðni frá Dana, annars mun hann leka einhverju sem Dana White vill ekki að verði opinbert.
Tyron Woodley sigraði Demian Maia á UFC 214 um helgina. Bardaginn þótti ekki skemmtilegur og gagnrýndi Dana White, forseti UFC, veltivigtarmeistarann á blaðamannafundinum eftir bardagann. Dana sagði að Woodley hefði átt að klára þetta í 1. eða 2. lotu.
Woodley spjallaði við The MMA Hour í gær. Hann var pirraður í viðtalinu enda nýbúinn að komast að því að hann þurfi að gangast undir aðgerð á öxlinni. Woodley meiddist á öxlinni í bardaganum gegn Maia og gat ekki beitt upphöggum eða yfirhandar hægri.
„Ég á skilið að fá afsökunarbeiðni. Þú [Dana White] þarft að biðja mig afsökunar opinberlega. Ef ég fæ það ekki mun ég fara að leka ýmsu sem þú vilt ekki að verði opinbert. Og ég er ekki að grínast,“ sagði Woodley.
Woodley er ekki eini meistarinn sem Dana White hefur gagnrýnt nýlega en bantamvigtarmeistari kvenna, Amanda Nunes, og fluguvigtarmeistarinn Demetrious Johnson hafa fengið að kenna á því. Viðtalið við Woodley má hlusta á hér að neðan.
