UFC hefur ákveðið að segja upp samningi John Lineker. Lineker er afar skemmtilegur bardagamaður og því kemur þetta á óvart.
John Lineker hefur verið í brasi undanfarnar vikur en þessi ákvörðun UFC kemur engu að síður á óvart. Lineker lýsti því yfir fyrr í sumar að hann væri pirraður á skorti á bardögum. Lineker sagðist vilja berjast meira en ef UFC væri ekki á sömu blaðsíðu ættu þeir að láta hann fara.
My last opponent fought 4 times in a year. He already has another fight! Sean likes him! I have fought only 4 times since 2016! I need to fight! If you dont like me or my style just let me go!!! @MMAjunkie @seanshelby @danawhite @Alexdavismma @ufc @MMAFighting @sherdogdotcom
— John Lineker (@johnlineker) May 29, 2019
Nokkrum dögum seinna fékk Lineker bardaga gegn Rob Font á UFC bardagakvöldinu þann 22. júní. Nokkrum dögum fyrir bardagann neyddist Lineker til að draga sig úr bardaganum þar sem hann fékk skurð á andlitið á æfingu. Þetta hjálpaði Lineker ekki og hefur samningi hans nú verið rift.
Lineker hefur nokkrum sinnum þurft að hætta við bardaga en þó sjaldan vegna meiðsla. Lineker hefur þurft að hætta við bardaga vegna veikinda, tannpínu og nú vegna skurðs. Þá hefur hann misst af stórum bardögum gegn Dominick Cruz og Cody Garbrandt vegna meiðsla andstæðinganna.
Lineker er einn skemmtilegasti bardagamaðurinn í bantamvigtinni og ætti ekki að vera í vandræðum með að finna nýjan vinnuveitanda. Lineker kom inn í UFC árið 2012 og þá í fluguvigtina en eftir nokkrar misheppnaðar tilraunir til að ná fluguvigtarmarkinu var honum skipað að fara upp í bantamvigt.
Lineker hefur 12 sinnum kýlt andstæðinginn sinn niður og er það met í tveimur léttustu flokkunum í UFC.
