Hinn fertugi Urijah Faber íhugar nú að snúa aftur í búrið. Faber lagði hanskana á hilluna árið 2018 og skoðar bardaga í júlí.
Urijah Faber varð fertugur fyrr í maí. Faber barðist síðast við Brad Pickett í desember 2016 og átti það að vera kveðjubardagi hans í MMA. Bardaginn fór fram í Sacramento í Kaliforníu en það eru heimaslóðir Faber. Faber fékk góða kveðjustund eftir sigurinn á Pickett og hefur fyrir löngu stimplað sig inn sem goðsögn í MMA heiminum og frumkvöðull.
Nú íhugar Faber að snúa aftur í búrið og berjast á UFC bardagakvöldinu í Sacramento þann 13. júlí. Faber varð pabbi á dögunum og langar að fara aftur í búrið.
„Barnið heldur mér ungum en góður slagur hjálpar líka til. Ég er alvarlega að skoða þetta. Mér hefur áður verið boðið að berjast og hef alltaf haldið mér í góðu formi. Undanfarið hálft ár hef ég verið að hugsa þetta nánar og það er freistandi,“ sagði Faber í The MMA Hour á mánudaginn.
„Mig langaði að hætta á sínum tíma. Það hljómar skemmtilega að berjast aftur og finnst mér eins og ég sé að missa af einhverju. Á mínum aldri næ ég að halda vel í þá yngri ennþá og ég vil ekki bíða of lengi með þetta. Einhver nöfn hafa verið nefnd til sögunnar, þetta gæti vel gerst.“
