0

Valgerður með bardaga í lok nóvember

Mynd: Christian Hestnæs

Valgerður Guðsteinsdóttir, fyrsta og eina atvinnuhnefaleikakona Íslands, stígur aftur í hringinn þann 27. nóvember. Valgerður stendur fyrir söfnun til að standa undir kostnaði við bardagann.

Valgerður er 4-2 í atvinnuhnefaleikum og hefur ekki keppt síðan í mars 2019 en þá sigraði hún Sabina Mishchenko með tæknilegu rothöggi í 5. lotu. Erfiðlega hefur gengið að fá bardaga síðan og hefur auðvitað heimsfaraldur sett strik í reikninginn hjá íþróttamönnum um allan heim.

Nú þegar viðburðarhald er komið aftur á fullt er Valgerður komin með bardaga. Hún mætir þá Diana Starkova frá Úkraínu á Night of Champions boxkvöldi í Svíþjóð. Starkova er 21 árs og 1-0-1 í atvinnuhnefaleikum en var með 41 bardaga í áhugahnefaleikum.

Þar sem langt er síðan Valgerður keppti síðast var hún æst í að ná einum bardaga fyrir áramót og því tilbúin að standa undir meiri kostnaði sjálf en vanalega. Valgerður stendur því fyrir söfnun á netinu:

„Þar sem það er langt síðan ég barðist síðast þarf ég að standa undir kostnaði fyrir næsta bardaga til að koma ferlinum mínum aftur á flug í þessu heimsástandi. Inni í þessum kostnaði er bardagapláss og tengdur kostnaður á viðburðinum, ferðakostnaður, gisting og uppihald, læknaskoðanir, vottorð og fleira. Ég ákvað því að stofna þessa söfnun til að hjálpa mér með kostnaðinn og þigg öll framlög með miklum þökkum,“ segir í textanum hjá söfnuninni.

Valgerður er því með staðfestan bardaga eftir mánuð og verður spennandi að fylgjast með bardaganum. Nánari upplýsingar um söfnunina má finna hér.

Pétur Marinó Jónsson
Latest posts by Pétur Marinó Jónsson (see all)

Pétur Marinó Jónsson

Eigandi og ritstjóri vefsins www.mmafrettir.is -Æft bardagaíþróttir í einhver ár (fjólublátt belti í BJJ) -BS í sálfræði -Lýsi UFC á Viaplay

Leave a Reply

This site uses Akismet to reduce spam. Learn how your comment data is processed.