Rússinn Roman Vlasov tók gullið í -75 kg flokki á Ólympíuleikunum í Ríó á dögunum. Þrátt fyrir að vera svæfður í undanúrslitunum fór kappinn alla leið í grísk-rómversku glímunni.
Roman Vlasov mætti Króatanum Bozo Starcevic í undanúrslitum. Þegar Vlasov var 6-0 yfir var hann svæfður af Starcevic. Uppgjafartök (í þeim tilgangi að fá andstæðinginn til að gefast upp) eru bönnuð í grísk-rómverskri glímu og þrátt fyrir að Vlasov hafi verið svæfður var glíman látin halda áfram. Starcevic fékk sín stig fyrir að koma Vlasov á bakið en á endanum sigraði Vlasov 6-3.
Vlasov komst því í úrslit þar sem hann sigraði Danann Mark Overgaard. Atvikið í undanúrslitunum má sjá hér að neðan.
