Háværir orðrómar voru á kreiki á dögunum að UFC ætli sér að heimsækja Danmörk í maí. Nú virðast bardagasamtökin hafa hætt við þau plön og ætla frekar til Svíþjóðar.
Pólska vefsíðan MMAnews.pl hélt því fram á dögunum að UFC myndi halda bardagakvöld í Danmörku í fyrsta sinn þann 27. maí. Nú heldur vefsíðan FloCombat því fram að þær áætlanir hafi breyst og mun UFC frekar halda bardagakvöld í Stokkhólmi í lok maí.
Bardagakvöldið á að fara fram í Ericsson Globe Arena líkt og bardagakvöldið þann 4. október 2014 þegar Gunnar Nelson barðist við Rick Story í aðalbardaga kvöldsins.
UFC hefur ekki heimsótt Svíþjóð síðan í janúar 2015 þegar Alexander Gustafsson tapaði fyrir Anthony Johnson fyrir framn 30.000 áhorfendur í Tele 2 Arena.
Allt eru þetta þó bara orðrómar og fáum við vonandi staðfestingu á næsta bardagakvöldi UFC í Evrópu (þ.e. á eftir bardagakvöldinu í London í mars) von bráðar.
