UFC bardagamaðurinn Alan Jouban hefur ákveðið að leggja hanskana á hilluna. Jouban er 38 ára gamall og barðist hjá UFC í sjö ár.
Alan Jouban verður sennilega helst minnst hér á landi fyrir að hafa mætt Gunnari Nelson í mars 2017. Þá var hann á þriggja bardaga sigurgöngu en Gunnar kláraði hann með hengingu í 2. lotu.
Gunnar Nelson makes Alan Jouban do the chicken dance with a heavy straight and finishes him off with a tight guillotine pic.twitter.com/zM3N51vK4H
— BirksMMA (@BirksMMA) September 10, 2020
Jouban átti fínan feril í UFC en komst aldrei á topp 15 í veltivigtinni. Hann vann átta bardaga í UFC og tapaði fimm en lýkur ferlinum með bardagaskorið 17-7.
Meðfram bardagaferlinum hefur Jouban starfað sem fyrirsæta. Þessa dagana höfum við séð hann sem sérfræðing í setti á UFC bardagakvöldum. Markmið hans er að gerast lýsandi hjá UFC og setur hann nú allan fókus á það.
Jouban barðist síðast á UFC 255 þar sem hann sigraði Jared Gooden í skemmtilegum bardaga. Jouban var fjórum sinnum í besta bardaga kvöldsins hjá UFC og getur gengið sáttur frá borði.
