Amanda Nunes mun ekki berjast þann 9. maí á næsta bardagakvöldi UFC. Nunes telur sig ekki geta undirbúið sig nægilega vel fyrir bardaga á meðan samkomubönn standa yfir.
UFC hefur þurft að fresta fjölmörgum bardagakvöldum vegna kórónaveirunnar. UFC stefnir á að halda sitt næsta bardagakvöld þann 9. maí en ekki er vitað hvar bardagakvöldið fer fram.
Vegna veirunnar eru allir bardagaklúbbar lokaðir og erfitt fyrir bardagafólk að undirbúa sig fyrir bardaga. Amanda Nunes hefur nú lýst því yfir að hún muni ekki berjast þann 9. maí. American Top Team, þar sem Amanda Nunes æfir, er lokaður en Nunes hefur fengið að æfa þar ásamt einum þjálfara.
Nunes átti að mæta Felicia Spencer um fjaðurvigtartitil kvenna en Nunes vill bíða átekta og sjá hvort hún geti fengið almennilegar æfingabúðir þegar hægt verður að opna.
Nunes leggur til að bardaginn fari fram í júní en hún mun í það minnsta ekki berjast í maí.
UFC hefur þegar hætt við bardagakvöldin sem áttu að vera þann 25. apríl og 2. maí en stefnir enn að því að halda stórt bardagakvöld þann 9. maí. Henry Cejudo og Dominick Cruz mætast í aðalbardaga kvöldsins eins og staðan er núna.
