Aron Leó Jóhannsson bar sigur úr býtum í sínum fyrsta bardaga á Evrópumeistaramótinu í MMA í dag. Aron er kominn áfram í 8-manna úrslit.
Evrópumeistaramótið í MMA fer fram á Ítalíu um þessar mundir. Aron Leó úr Reykjavík MMA er eini Íslendingurinn sem keppir á mótinu en hann keppir í -84 kg millivigt.
Fyrsti keppnisdagur var á þriðjudaginn og sat Aron hjá í fyrstu umferð. Hann mætti Jack Heycock frá Wales í dag (miðvikudag) og var ekki í neinum vandræðum. Heycock reyndi ítrekað að ná Aroni niður en Aron var betri glímumaðurinn og komst sjálfur ofan á í gólfinu í öllum lotum. Þar var Heycock aldrei líklegur til að sleppa og vann Aron allar þrjár loturnar mjög örugglega.
Aron er því kominn í 8-manna úrslit en þar mætir hann Brajan Przysiwek frá Póllandi. Brajan sigraði Tomas Figueira frá Portúgal eftir klofna dómaraákvörðun fyrr í dag.
Aron kemur lítið skaddaður úr viðureign dagsins og ætti að vera nokkuð ferskur fyrir bardagann á fimmtudaginn. Hægt er að horfa á mótið á IMMAF.TV en streymið á mótið kostar 9,99 evrur.
