UFC 244 fer fram í Madison Square Garden þann 2. nóvember. Svo virðist sem enginn alvöru titilbardagi verði á kvöldinu en nokkrir spennandi bardagar hafa verið tilkynntir.
Eins og Dana White greindi frá um helgina munu þeir Jorge Masvidal og Nate Diaz mætast í aðalbardaganum á UFC 244. Munu þeir berjast um svo kallað Baddest Motherfucker beltið en bardaginn fer fram í veltivigt.
Brett Okomoto hjá ESPN hefur síðan greint frá því að bardagi Darren Till og Kelvin Gastelum verði næstsíðasti bardagi kvöldsins. Þetta verður frumraun Till í millivigt en Till hefur tapað tveimur bardögum í röð.
Í þungavigt munu þeir Derrick Lewis og Blagoy Ivanov mætast. Lewis var í aðalbardaganum í Madison Square Garden í fyrra þegar hann tapaði fyrir Daniel Cormier.
Skemmtikrafturinn Johnny Walker mætir Corey Anderson í léttþungavigt á kvöldinu. Walker hefur komið skemmtilega á óvart í UFC og unnið alla þrjá bardaga sína í UFC í 1. lotu. Hann hefur verið frá um tíma þar sem hann meiddist á öxl í fögnuðinum eftir síðasta bardaga.
Í þessari viku var bardagi Stephen Thompson og Vicente Luque staðfestur í veltivigt. Thompson hefur átt erfitt uppdráttar en hann hefur bara unnið einn af síðustu fimm bardögum sínum og var rotaður í fyrsta sinn í febrúar. Luque hefur verið á frábæru skriði en hann hefur unnið 10 af síðustu 11 bardögum sínum.
