Bellator 255 fór fram í gær í Bandaríkjunum. Þetta var fyrsta bardagakvöld Bellator á árinu og erum við lokins komin með úrslitaviðureign í fjaðurvigtarmóti Bellator.
Þeir Patricio ‘Pitbull’ Freire og Emmanuel Sanchez mættust í aðalbardaga kvöldsins á Bellator 255. Þetta var seinni undanúrslitaviðureignin í fjaðurvigtarmóti Bellator og var þetta í annað sinn sem þeir Pitbull og Sanchez mætast.
Fyrri bardaginn var jafn þar sem Pitbull sigraði eftir dómaraákvörðun í fimm lotu bardaga. Í þetta sinn þurfti hann bara hálfa lotu til að gera út um bardagann. Pitbull felldi Sanchez með góðum vinstri krók og stökk á hálsinn á honum með „guillotine“ hengingu. Sanchez tappaði ekki út en var þess í stað svæfður.
#Bellator255 pic.twitter.com/FSXPySjGRh
— Streetfight Banned-cho (@streetfitebncho) April 3, 2021
Pitbull, sem er bæði ríkjandi meistari í fjaðurvigt og léttvigt, er því kominn í úrslit í fjaðurvigtarmótinu. Þar mætir hann A.J. McKee og er það einn mest spennandi bardagi sem Bellator getur boðið upp á. Sá bardagi verður á dagskrá síðar á árinu en sigurvegarinn fær milljón dollara og verður auk þess fjaðurvigtarmeistari Bellator.
