Fyrrum þungavigtarmeistari UFC, Cain Velasquez, hefur formlega lagt hanskana á hilluna og ætlar að einbeita sér að fjölbragðaglímunni. Cain barðist síðast í febrúar en hefur sennilega barist sinn síðasta MMA bardaga.
Cain Velasquez tilkynnti þetta á blaðamannafundi á föstudaginn. Cain hefur gert samning við WWE fjölbragðaglímusamtökin og mun hann mæta Brock Lesnar í lok október. Cain varð einmitt þungavigtarmeistari UFC með sigri á Lesnar í október 2010.
Cain var þjakaður af meiðslum lungann af ferlinum. Eftir tæplega þriggja ára fjarveru snéri hann aftur í febrúar en tapaði fyrir Francis Ngannou eftir aðeins 26 sekúndur.
Cain mun ekki lengur vera í lyfjaprófum USADA en ef hann ætlar að snúa aftur í UFC þarf hann að gangast undir lyfjapróf í sex mánuði til að mega aftur keppa. Hinn 37 ára Cain mun samt halda áfram að æfa eitthvað hjá AKA en að öllum líkindum höfum við séð það síðasta af honum í MMA.
