Donald Cerrone og Robbie Lawler munu berjast á UFC 214 eftir allt saman. Kapparnir áttu að mætast á UFC 213 en bardaganum var frestað vegna blóðsýkingar Cerrone.
Fljótlega eftir að fregnir bárust af aflýsingu bardagans lýsti Cerrone því yfir á samfélagsmiðlum að hann væri með sýkingu. Fyrstu fregnir hermdu að bardaganum yrði frestað til UFC 214 sem fer fram þann 29. júlí. Dana White, forseti UFC, var samt fljótur að skjóta það niður í síðustu viku.
„Cowboy Cerrone er nagli. Hann er alltof harður og hann vildi berjast. Hann er hins vegar með rifinn nára, með mar frá hnénu og upp í nára og svo er hitt hnéð stökkbólgið. Og svo er hann með sýkingu. Gæti hann barist [á UFC 214]? Sennilega. Ætti hann að berjast við Robbie Lawler með rifinn nára? Nei, það ætti hann ekki að gera. Hann mun ná heilsu og við setjum bardagann aftur á dagskrá. Hann mun ekki berjast í Anaheim,“ sagði White en UFC 214 fer fram í Anaheim í Kaliforníu.
Nú hefur Lance Pugmire hjá LA Times greint frá því að bardaginn verði á UFC 214.
Just received word from @danawhite that @Cowboycerrone @Ruthless_RL is moving from Saturday to Anaheim’s UFC 214 on July 29.
— Lance Pugmire (@latimespugmire) July 2, 2017
Fleiri miðlar hafa staðfest frásögn Pugmire og bendir því allt til þess að draumabardagi Cerrone og Lawler fari fram á UFC 214.
