Bantamvigtarmeistarinn Cody Garbrandt er tæpur fyrir sína fyrstu titilvörn gegn T.J. Dillashaw í sumar. Garbrandt þarf að hitta sérfræðing í Þýskalandi og gæti þurft að draga sig úr bardaganum.
Þeir Cody Garbrandt og T.J. Dillashaw eiga að mætast í aðalbardaganum á UFC 213 þann 8. júlí. Hvorugur var þó viðstaddur blaðamannafundinn á föstudaginn þar sem stærstu bardagar sumarsins voru kynntir.
Garbrandt á við bakmeiðsli að stríða og er á leið til Þýskalands í meðferð. „Flýg til Þýskalands á morgun fyrir mína aðra bakmeðferð á þremur mánuðum. Hvíldu þig vel T.J. Dillashaw, þinn tími kemur,“ sagði Garbrandt á Twitter en hann eyddi færslunni síðar.
„Ég reif eitthvað í bakinu fyrir tveimur mánuðum síðan og fór í stofnfrumumeðferð sem virkaði ekki eins og mér var sagt. Fer nú til Þýskalands í aðra meðferð,“ sagði Garbrandt enn fremur.
Ariel Helwani staðfesti að bardaginn væri í hættu:
Garbrandt-Dillashaw, which was slated to be the new 213 main event, is in jeopardy. Garbrandt dealing with a serious back issue …
— Ariel Helwani (@arielhelwani) May 12, 2017
Dillashaw hefur reynt að fá bardaga gegn Demetrious Johnson í staðinn um fluguvigtartitilinn. Johnson virtist þó vera lítið spenntur fyrir því þar sem Dillashaw er ekki meistari.
Eins og staðan er núna er bardaginn ennþá á dagskrá en það gæti breyst ef meðferðin heppnast ekki.
