Bardagaaðdáendur þurftu ekki að bíða lengi eftir fyrstu ummælum Conor McGregor um sinn næsta andstæðing, Rafael dos Anjos. Í tilkynningu á opinberri Facebook síðu sinni ætlar hann að ganga frá föðurlandssvikaranum Rafel dos Anjos.
Bardagi Conor McGregor og Rafael dos Anjos var loksins formlega tilkynntur af UFC fyrr í kvöld eftir nokkurra daga bið.
Fjaðurvigtarmeistarinn Conor McGregor mun þá mæta léttvigtarmeistaranum Rafael dos Anjos um léttvigtarbeltið. Írinn kjaftfori getur því orðið sá fyrsti í sögu UFC til að halda tveimur beltum á sama tíma.
Skömmu eftir formlega tilkynningu UFC birti Conor McGregor afar áhugaverðan póst á opinberri Facebook síðu sinni. McGregor kynnti póstinn sem sérstaka viðskiptaákvörðun kóngsins í boði EA Sports.
Í póstinum þakkaði hann aðdáendum og fjölmiðlum fyrir þolinmæði sína í biðinni eftir formlegri tilkynningu frá UFC. McGregor var víst of upptekinn við að telja aurana sína eftir sinn síðasta bardaga.
McGregor segist ætla að ganga frá dos Anjos og ætlar að tileinka Brasilíu og þeim sem eru trúir sínum rótum væntanlegum sigri á dos Anjos.
Þar með er McGregor að skjóta á dos Anjos sem er fæddur og uppalinn í Brasilíu en býr nú og æfir í Kaliforníu hjá Kings MMA.
McGregor vill meina að með því að búa ekki í heimalandinu sé dos Anjos föðurlandssvikari og ætlar hann að afhöfða dos Anjos í nafni Brasilíu.
Bardaginn verður aðalbardaginn á UFC 197 þann 5. mars. Í næstsíðasta bardaga kvöldsins mætast þær Holly Holm og Miesha Tate um bantamvigtartitilinn.
Af Instagram reikningi Conor McGregor.
Af opinberri Facebook síðu McGregor
OFFICIAL FIGHT ANNOUNCEMENT:Conor McGregor Vs Rafael Dos Anjos for the UFC Lightweight World Championship.March 5th….
Posted by Conor McGregor on Tuesday, January 12, 2016
