Boxbardagi Floyd Mayweather og Conor McGregor fór fram í nótt. Bardaginn var skemmtilegur og jafn framan af en að lokum var það Floyd Mayweather sem stóð uppi sem sigurvegari.
Þetta var fyrsti bardagi Conor í atvinnuhnefaleikum og getur hann gengið nokkuð sáttur frá borði eftir bardagann gegn Floyd Mayweather.
Conor byrjaði mjög vel og tók fyrstu þrjár loturnar að flestra mati. Floyd gerði lítið annað en að verjast fyrstu tvær loturnar en þegar leið á bardagann fór hann að sýna meira.
Eftir þriðju lotuna var Floyd farinn að hitna ansi vel og fór að hitta inn fleiri og fleiri höggum eftir því sem loturnar urðu fleiri. Conor varð þreyttari og þreyttari og virtist bara vera tímaspursmál hvenær Floyd myndi klára bardagann.
Eftir röð högga í 10. lotu hafði dómarinn séð nóg og steig á milli og stöðvaði bardagann. Floyd sigraði því með tæknilegu rothöggi í 10. lotu og klárar ferilinn 50-0.
Conor stóð sig betur en margir þorðu að vona en viðurkenndi sjálfur að hann hefði viljað fá að klára 10. lotuna áðu en dómarinn stöðvaði bardagann.
