Frá vinstri: Álvaro, Haraldur, Jón Ingi, Aron og Gunnar Már.
Fimm bardagamenn frá Reykjavík MMA keppa í Skotlandi á laugardaginn. Bardagarnir fara fram á Evolution of Combat bardagakvöldinu.
Af bardagamönnunum fimm eru þrír að taka sína fyrstu bardaga. Þetta er í fjórða sinn sem Evolution of Combat heldur bardagakvöld og hafa Reykjavík MMA reglulega verið með bardaga hjá þeim. Bardagarnir á laugardaginn fara fram í Glasgow.
Aron Kevinsson (2-1) mætir Bradley Scott (2-1) í léttvigt. Aron barðist síðast í desember þar sem hann fór með sigur af hólmi en Aron tók þrjá bardaga á síðasta ári.
Jón Ingi tók sinn fyrsta bardaga á þessu ári þar sem hann sigraði eftir rothögg í 1. lotu en Jón Ingi er aðeins 18 ára gamall. Jón Ingi mætir Sean Clancy Jr. (1-0) í léttvigt.
Gunnar Már mætir Jeff Akham í fjaðurvigt á kvöldinu en báðir eru að taka sína fyrstu MMA bardaga. Haraldur Arnarson keppir einnig sinn fyrsta bardaga en hann mætir Sean Stroud (0-1) í 176 punda hentivigt. Álvaro Heredero Lopez (0-0) mætir síðan Thomas Callaghan (0-1) í léttvigt.
Bardögunum verður streymt en nánari upplýsingar um streymi koma innan tíðar. Þá verða bardagarnir einnig sýndir í húsakynnum Reykjavík MMA (sjá nánar hér).
