Föstudagstopplistinn á þessum langa föstudegi er mættur! Nú er fyrsta þriðjungi ársins 2014 að ljúka og 12 viðburðir hafa verið haldnir í UFC til þessa. Það er aldrei hægt að gera öllum góðu rothöggum heils árs góð skil í stuttum lista svo hér verður rennt yfir flottustu rothöggin sem við höfum þegar fengið að sjá.
5. Roy Nelson vs. Antônio Rodrigo Nogueira
UFC Fight Night: Nogueira vs. Nelson – 11. apríl 2014
Síðastliðinn föstudag var Roy Nelson samur við sig þegar hann rotaði „Big Nog“ með glæsilega einkennishögginu sínu eftir 3:37 í fyrstu lotu og labbaði svo rólegur í burtu.
4. KJ Noons vs. Sam Stout
The Ultimate Fighter Nations Finale: Bisping vs. Kennedy – 16. apríl 2014
KJ Noons lenti níðþungri hægri hönd á hökuna á Stout í vikunni eftir bara 30 sekúndna bardaga og varð þar með fyrstur til að rota Stout.
3. Donald Cerrone vs. Adriano Martins
UFC on Fox: Henderson vs. Thomson – 25. janúar 2014
Donald “Cowboy” Cerrone sýndi hvað hann getur verið ótrúlega banvænn þegar hann lenti þessu bylmingssparki beint í hökuna á Martins í janúar. Cerrone lenti sparkinu eftir 4:40 í fyrstu lotu. Cerrone mætir Edson Barboza á annað kvöld á UFC on Fox.
2. Dong Hyun Kim vs. John Hathaway
UFC Fight Night: Kim vs. Hathaway – 1. mars 2014
Kim setti endapunktinn á úrslitakvöld The Ultimate Fighter: China með stórglæsilegum olnboga eftir 1:02 í þriðju lotu og endaði þannig þriggja bardaga sigurgöngu Hathaway.
1. Godofredo Castro vs. Noad Lahat
UFC Fight Night: Shogun vs. Henderson 2 – 24. mars 2014
Godofredo „Pepey“ var ekki lengi að afgreiða Ladat í fyrsta bardaga kvöldsins og setti tóninn fyrir frábæran viðburð. Pepey rotaði Ladat eftir 2:39 í fyrstu lotu.
Heldur þú að eitt af þessum rothöggum verði valið rothögg ársins í UFC? Eða er það besta enn framundan?
