Ísland er úr leik á HM áhugamanna í MMA í ár. Björn Þorleifur tapaði fyrir skömmu en í morgun féll Ingibjörg einnig úr leik.
Íslenski hópurinn kemur ekki heim með verðlaun af Heimsmeistaramótinu í ár en kemur heim reynslunni ríkari. Af sex keppendum er enginn eftir en Björn Þorleifur og Ingibjörg féllu út í 8-manna úrslitum í dag, Halldór Logi Valsson og Kári Jóhannesson féllu út í gær og þeir Ásgeir Marteinsson og Oliver Axfjörð Sveinsson á mánudaginn.
Sjá einnig: Ingibjörg Helga tapaði eftir klofna dómaraákvörðun
Björn Þorleifur mætti Ítalanum Dario Bellandi í millivigt nú fyrir skömmu. Bellandi er einn af þeim sigurstranglegustu í millivigtinni í ár en hann er tvöfaldur Evrópumeistari í MMA.
Þeir Björn og Bellandi þreyfuðu fyrir sér standandi en Björn tók svo Ítalann niður eftir að hafa gripið spark. Í gólfinu var Bellandi með nokkur þung högg af bakinu og fór í omaplata axlarlás en skipti svo snöggt yfir í armlás með þeim afleiðingum að Björn þurfti að tappa út í 1. lotu. Mótið þar með búið í ár hjá íslenska hópnum. Björn fékk þrjá bardaga á mótinu og er nú 4-2 sem áhugamaður í MMA.
