Israel Adesanya mætir Yoel Romero á laugardaginn. Adesanya segist vera í toppstandi fyrir bardagann og sé ekki með sýkingu.
Á dögunum birtist viðtal við Adesanya þar sem hann leit út fyrir að vera með lítið sár á framhandleggnum. MMA aðdáendur voru fljótir að benda á að þetta gæti verið sýking í handleggnum sem gæti haft áhrif á bardagann. Slíkar sýkingar geta verið hættusamar þar sem sýklalyf geta verið lýjandi og þá gæti íþróttasambandið í Nevada bannað mönnum að keppa ef þeir eru sýktir þó það sé sjaldgæft.
Adesanya þvertók fyrir að hann sé með einhvers konar sýkingu í viðtali við Ariel Helwani í gær. Adesanya segir að þetta sé bara lítil skráma og ekkert til að hafa áhyggjur af. „Þetta er bara eitthvað smávægilegt. Ég hef aldrei fengið sýkingu (e. staph) og mun aldrei fá. Ég hef fengið malaríu átta sinnum en ég veit ekki hvað annað ég hef fengið. Helduru að sýking muni skemma fyrir mér?“ sagði Adesanya á mánudaginn.
Adesanya segist ekki vera á sýklalyfjum og þetta sé ekkert til að hafa áhyggjur af. Adesanya mætir Yoel Romero á UFC 248 á laugardaginn.
