Það verður bráðabirgðartitilbardagi í millivigt á dagskrá í apríl. Þeir Israel Adesanya og Kelvin Gastelum mætast á UFC 236 þann 13. apríl en nokkrir fjölmiðlar greina frá.
Millivigtarmeistarinn Robert Whittaker átti að verja titilinn sinn gegn Kelvin Gastelum fyrr í febrúar. Nokkrum klukkustundum fyrir bardagann var Whittaker ófær um að berjast þar sem hann var með slæmt kviðslit. Whittaker fór umsvifalaust í aðgerð og má ekki byrja að æfa létt fyrr en eftir 6-8 vikur. UFC hefur því ákveðið að henda upp bráðabirgðartitilbardaga á meðan meistarinn er fjarverandi.
Kelvin Gastelum fékk titilbardagann gegn Whittaker eftir tvo sigra gegn Michael Bisping og Ronaldo ‘Jacare’ Souza. Israel Adesanay er 5-0 síðan hann samdi við UFC og sigraði Anderson Silva í aðalbardaga kvöldsins á UFC 234 fyrr í mánuðinum. Adesanya var búinn að tala um að taka sér smá pásu eftir bardagann enda hefur hann tekið alla fimm bardaga sína í UFC á aðeins 12 mánuðum.
Þetta er fyrsti bardaginn sem tilkynntur er á bardagakvöldið en enn á eftir að staðfesta hvar bardagakvöldið fer fram.
