Kvikmynd um ævi Jose Aldo var frumsýnd í Brasilíu á miðvikudaginn. Aldo viðurkennir að hafa fellt tár eftir að hafa horft á kvikmyndina.
Kvikmyndin kallast Mais forte que o mundo sem þýðist sem „Sterkari en heimurinn“. Myndin segir frá ævi Jose Aldo og draumnum hans að verða atvinnubardagamaður. Leikstjóri myndarinnar einblínir mikið á erfitt samband Aldo við föður sinn. Ekki er vitað hvort kvikmyndin verði sýnd víðar en í Brasilíu.
Faðir Aldo átti við drykkjuvandamál að stríða og lagði hönd á eiginkonu sína. Mamma Aldo flutti út ásamt systrum hans á meðan Aldo hélt til Rio de Janeiro til að æfa í Nova Uniao. Aldo gisti auk þess í bardagaklúbbnum og átti vart til hnífs og skeiðar.
„Það er erfitt að gráta ekki. Þetta er falleg mynd hvort sem þú ert MMA aðdáandi eða ekki. Þetta er myndin mín svo mér fannst hún auðvitað frábær,“ sagði Aldo og hló. „Samband mitt við pabba, sem er bæði hetja og skúrkur, er mjög fallegt í myndinni.“
Myndin nær allt frá æsku Aldo til sigurs hans á Mark Hominick fyrir framan 55.000 manns í Kanada. Margt hefur þó breyst síðan Aldo sigraði Hominick og gætum við séð framhald af myndinni. Rígur hans við McGregor er sérstaklega áhugaverður og væri best fyrir framleiðendur myndarinnar ef þeir Aldo og McGregor mætast aftur þar sem Aldo myndi sigra.
Myndina átti að frumsýna í desember, viku eftir UFC 194, en eftir að McGregor rotaði Aldo á 13 sekúndum var frumsýningu myndarinnar frestað. Nánar má lesa um myndina á vef MMA Figting.
Stiklu fyrir myndina má sjá hér að neðan.
