0

Línurnar skýrast í veltivigtinni – BMF titillinn aftur á dagskrá?

Miðað við nýjustu orðróma eru línurnar að skýrast í veltivigt UFC. Svo virðist sem BMF titillinn verður aftur á dagskrá hjá Nate Diaz og Jorge Masvidal.

Ríkjandi meistari Kamaru Usman mun væntanlega verja veltivigtartitilinn næst gegn Gilbert Burns. Þeir áttu upphaflega að mætast í júlí en aðeins viku fyrir bardagann greindist Burns með kórónuveiruna og kom Jorge Masvidal inn í hans stað. Þeir munu væntanlega klára málin í desember en UFC stefnir á að hýsa bardagann á UFC 256 þann 12. desember.

Talið er að UFC sé nálægt því að ganga frá samningum en sjálfur kannaðist Burns ekkert við komandi titilbardaga.

Síðasti andstæðingur Usman, Jorge Masvidal, er síðan í viðræðum við UFC um næsta bardaga. UFC er að stefna á annan bardaga milli Masvidal og Nate Diaz. Fyrri bardagi þeirra fór fram í nóvember og var um svo kallað „Baddest Motherfucker“ belti eða BMF beltið eins og það var kallað.

Masvidal sigraði eftir að læknirinn stöðvaði bardagann í 3. lotu en margir voru ósáttir við endalok bardagans, þar á meðal Dana White, forseti UFC. Masvidal og Diaz gætu því mæst aftur og verður BMF titillinn aftur í húfi.

Bardaginn væri annað hvort á UFC 256 í desember eða aðalbardaginn á bardagakvöldi í janúar.

Eftir situr Leon Edwards en hann hefur lengi sóst eftir því að mæta Jorge Masvidal. Hann gæti þó fengið bardaga gegn Stephen ‘Wonderboy’ Thompson.

BMF beltið.
Pétur Marinó Jónsson

Pétur Marinó Jónsson

Eigandi og ritstjóri vefsins www.mmafrettir.is -Æft bardagaíþróttir í einhver ár (fjólublátt belti í BJJ) -BS í sálfræði -Lýsi UFC á Stöð 2 Sport -MMA fíkill

Leave a Reply

This site uses Akismet to reduce spam. Learn how your comment data is processed.