Lyoto Machida fékk í gær 18 mánaða keppnisbann frá USADA eftir fall á lyfjaprófi. Machida féll á lyfjaprófi í apríl og getur því ekki keppt fyrr en í október 2017.
Lyoto Machida átti að mæta Dan Henderson á UFC on Fox 19 í apríl en aðeins þremur dögum fyrir bardagann kom í ljós að Machida hefði fallið á lyfjaprófi. Bardaginn var í kjölfarið blásinn af en bannið nær frá 8. apríl 2016.
Machida viðurkenndi neyslu sína á vöru sem innihélt bannaða efnið 7-keto-dehydroepiandrosterone (DHEA) sem fannst í lyfsýni hans í apríl. Machida vissi ekki að varan innihéldi þetta bannaða efni en efnið mátti finna í innihaldslýsingunni svo ekki var um að ræða óhreint fæðubótarefni.
Machida átti yfir höfði sér tveggja ára bann en samvinna hans við USADA og sú staðreynd að hann viðurkenndi inntöku á vörunni gerði það að verkum að bannið var stytt.
Efnið 7-keto-DHEA er skráð sem anabólískt efni hjá WADA (World Anti-Doping Agency). Efnið á að auka efnaskipti líkamans, hjálpa við þyngdarlosun og hægja á öldrun.
Hinn 38 ára Machida mun því ekkert berjast fyrr en seint á næsta ári. Machida hefur tapað tveimur bardögum í röð og ekki unnið bardaga síðan hann vann C.B. Dollaway í desember 2014.
Heimild: MMA Fighting
