Það eru ýmsar spurningar sem vakna í kringum lyfjapróf Anderson Silva og Nick Diaz. Bardagamennirnir fóru í þrjú próf og lítur íþróttasamband Nevada ansi illa út þessa dagana.
Anderson Silva og Nick Diaz fóru í þrjú lyfjapróf í tengslum við bardaga þeirra á UFC 183. Fyrsta prófið var framkvæmt þann 9. janúar og liggja niðurstöðurnar fyrir. Þar fundust sterar í lyfjaprófi Anderson en lyfjapróf Nick Diaz kom hreint út. Annað prófið var framkvæmt þann 19. janúar og er enn beðið eftir niðurstöðunum úr því prófi. Þriðja og síðasta prófið var framkvæmt eftir bardagann og gáfu báðir bardagamenn þvagsýni. Sýni Anderson Silva kom hreint út á meðan marijúana fannst í sýni Diaz.
Ætla mætti að lyfjaprófin sem fara fram fyrir bardagann eigi að koma í veg fyrir að íþróttamenn komist upp með að keppa eftir að hafa neytt ólöglegra lyfja. Svo virðist ekki vera í þessu máli enda komu niðurstöður prófsins fyrst í ljós í gær, þriðjudaginn 3. febrúar, þremur dögum eftir bardagann. Samkvæmt íþróttasambandi Nevada, NAC, hefði verið komið í veg fyrir að Anderson Silva fengi að berjast ef þeir hefðu vitað niðurstöður lyfjaprófsins. Það er svo annað mál hvers vegna það tók svo langan tíma að fá niðurstöðu prófsins.
Dr. Johnny Benjamin er virtur læknir í Bandaríkjunum og hann hafði þetta að segja um málið á Twitter.
VERY likely NSAC knew results PRIOR to fight or delayed testing to after fight…either way Nevada AG needs to do a sham investigation
— Dr. Johnny Benjamin (@DrJCBenjamin) February 4, 2015
The actual time to run this type of testing is measured in minutes NOT weeks. You connect the dots from there — Dr. Johnny Benjamin (@DrJCBenjamin) February 4, 2015
Promoters & SACs are business partners. Promoters pay HUGE fees to SACs (majority of their budgets). Reluctant to bite hand that feeds them
— Dr. Johnny Benjamin (@DrJCBenjamin) February 4, 2015
SAC = Sports Athletic Commission
NAC hafa auðvitað hagsmuna að gæta. NAC græðir á því ef UFC heldur stór bardagakvöld í Nevada fylki og kannski ekki mikil hvatning fyrir sambandið til að birta niðurstöður lyfjaprófa fyrir bardagana. Allt eru þetta þó vangaveltur og kannski ótímabært að setja upp samsærishattinn.
Þetta lítur þó ekki vel út fyrir NAC en aðeins mánuður er síðan lyfjapróf Jon Jones komst í fréttirnar þremur dögum eftir bardaga hans og Daniel Cormier. Sú staða var þó öðruvísi þar sem prófað var fyrir kókaín vegna mistaka.
NAC er þó meðvitað um vandann og ætlar að gera betur. Bob Bennett, yfirmaður NAC, segir það óheppilegt að niðurstöður lyfjaprófanna komi svo seint en tíminn mun leiða það í ljós hvort bæting verði á.
