Eitt stærsta umræðuefnið í MMA heiminum í dag er hvort Conor McGregor muni verja léttvigtartitil sinn gegn Tony Ferguson. Teiknarinn Mojahed Fudilat birti á dögunum ansi fyndna teiknimynd sem sýnir stöðuna í léttvigtinni að vissu leyti.
Mojahed Fudilat birtir reglulega stuttar teiknimyndir sem tengjast málefnum líðandi stundar í MMA heiminum. Tony Ferguson sigraði Kevin Lee um síðustu helgi og varð þar með bráðabirgðarmeistari UFC í léttvigtinni. Ferguson vill fá bardaga gegn ríkjandi léttvigtarmeistara, Conor McGregor, en óvist er hvort sú verði raunin.
Í teiknimyndinni má sjá Ferguson lokka þá Khabib Nurmagomedov, Kevin Lee og Conor McGregor með tiramisu. Eftirrétturinn hefur oft verið bendlaður við Khabib eftir erfiðleika hans í niðurskurðinum fyrir bardagann gegn Ferguson á UFC 209. Khabib virtist gæða sér á eftirréttinum í Embedded þáttunum fyrir UFC 209 en Khabib hefur sjálfur neitað því að hafa fengið sér eftirrétt skömmu fyrir áætlaðan bardagann. Ekkert varð úr bardaga þeirra á UFC 209 þar sem Khabib mætti ekki í vigtun.
