Nick Diaz er kominn í tímabundið bann eftir að hafa brotið lyfjareglur USADA. Nick Diaz fannst ekki þegar hann átti að fara í lyfjapróf og er það skýrt brot á reglum USADA.
Allir bardagamenn UFC þurfa sjálfkrafa að fylgja reglum USADA sem sér um öll lyfjamál UFC. Allir bardagamenn UFC þurfa að láta USADA vita hvar í heiminum þeir eru staðsettir svo hægt sé að taka þá í óvænt lyfjapróf utan keppnis allt árið í kring.
Það gerði Nick Diaz ekki og gat USADA ekki fundið hann þrisvar á 12 mánaða tímabili þegar hann átti að fara í lyfjapróf. Þar með hefur Diaz brotið reglur USADA og er hann á leið í bann.
Nick Diaz er sennilega nokkuð sama um USADA enda er hann sennilega hættur og ekkert á leiðinni að fara að berjast. Diaz bræðurnir Nick og Nate eru ötullir andstæðingar steranotkunar og saka flesta andstæðinga sína um að vera á frammistöðubætandi efnum. Það væri ólíklegt að finna frammistöðubætandi efni í lyfjaprófum þeirra svona utan keppnis.
Þeir eru aftur á móti duglegir við grasreykingarnar og fara eki leynt með það. USADA er hins vegar ekki að lyfjaprófa fyrir efni á borð við marijúana og önnur fíkniefni utan keppnis.
USADA mun ákvarða refsingu hans á næstunni en þetta kom fram á heimasíðu UFC.
