UFC 242 fer fram á laugardaginn í Abu Dhabi. Í aðalbardaga kvöldsins mætast þeir Khabib Nurmagomedov og Dustin Poirier.
Faðir Khabib Nurmagomedov lét hafa eftir sér í viðtali á miðvikudaginn að Khabib væri sem stendur 76 kg. Hann stefnir því á að skera niður 5,5 kg (12,5 pund) á 48 tímum og mun gera það á fjórum æfingum.
Þessi niðurskurður verður að teljast nokkuð skynsamlegur miðað við hvað tíðkast, en sem dæmi skar veltivigameistarinn Kamaru Usman eitt sinn niður um tæp sex kíló á þremur tímum þegar hann var varamaður fyrir bardaga Darren Till og Tyron Woodley.
Það er allt að smella fyrir titilbardagann og báðir menn virðast í toppstandi. Útsending frá viðburðinum er á góðum tíma og hefst aðalhuti bardagakvöldsins kl. 18.00 á íslenskum tíma og verður í þráðbeinni á Stöð 2 Sport.
