Í kvöld fer fram UFC bardagakvöld í Brisbane í Ástralíu þar sem stóru kallarnir Mark Hunt og Frank Mir eigast við. Það eru kannski ekki stærstu nöfnin á kvöldinu en samt sem áður má þar finna nokkra áhugaverða bardaga.
- Rothöggsvélin Mark Hunt: Síðast þegar Mark Hunt barðist í Brisbane mætti hann Antonio ‘Bigfoot’ Silva í einum besta bardaga í sögu þungavigtarinnar. Bardaginn endaði með jafntefli eftir fimm blóðugar lotur og er það síðasti bardagi Hunt sem farið hefur í dómaraákvörðun. Hunt hefur síðan þá rotað þá Roy Nelson og fyrrnefndan Bigfoot er þeir mættust aftur en sjálfur tapað eftir rothögg fyrir þeim Stipe Miocic og Fabricio Werdum. Á morgun mætir hann Frank Mir og er spurning hvort við fáum enn eitt rothöggið á morgun?
- Hvernig mun Hector Lombard líta út? Hector Lombard snýr aftur í kvöld eftir eins árs keppnisbann eftir að hafa fallið á lyfjaprófi. Hinn 38 ára Lombard hefur sigrað alla þrjá bardaga sína síðan hann fór niður í veltivigt (sigurinn á Burkman var þó dæmdur ógildur eftir að hann féll á lyfjaprófinu). Það verður áhugavert að sjá hvernig hann kemur til leiks í kvöld eftir bannið og hvort það verði einhver munur á honum.
- Kemst Magny í titilbaráttuna: Neil Magny hefur farið hamförum á undanförnum tveimur árum og sigrað níu af síðustu tíu bardögum sínum í UFC. Magny hefur sigrað sterka andstæðinga á borð við Erick Silva og Kelvin Gastelum síðan hann tapaði fyrir Demian Maia. Takist honum að sigra Hector Lombard verður hann kominn í þéttskipaða titilbaráttuna í sterkasta flokki UFC.
- Tveir efnilegir mætast: Hinn 21 árs Jake Matthews er spennandi strákur í léttvigtinni. Matthews mætir Johny Case en sá síðarnefndi hefur sigrað alla fjóra bardaga sína í UFC þó nokkuð lítið hafi farið fyrir honum. Case er ekki síður efnilegur en Matthews enda bara 26 ára gamall en báðir sýna stöðugar framfarir í hvert sinn sem þeir berjast. Þetta verður sennilega einn af betri bardögum kvöldsins. Hvor er betri á þessum tímapunkti ferilsins?
Aðalhluti bardagakvöldsins hefst kl 2 og verður í beinni útsendingu á Stöð 2 Sport en fyrstu bardagar kvöldsins hefjast kl 23 á Fight Pass rás UFC.
