Í kvöld fara fram úrslit The Ultimate Fighter 19 þáttaraðarinnar. Þessi viðburður hefur dvalið í skugga UFC 175, sem fór fram síðastliðna nótt, en þrátt fyrir það eru nokkrir spennandi bardagar á dagskrá. Hér eru nokkrar ástæður fyrir því af hverju þú ættir ekki að missa af þessu.
B.J. Penn færir sig niður um tvo þyngdarflokka og keppir loks í réttum þyngdarflokki
Það hefur loðað við B.J. Penn allan sinn feril að hann leggi ekki nægilega hart að sér og að hann sé í raun að keppa í röngum þyngdarflokki. Þetta sást bersýnilega í síðasta bardaga hans gegn Rory MacDonald þar sem Penn var einfaldlega allt of lítill. Hann hefur meira að segja keppt við fyrrverandi léttþungavigtarmanninn Lyoto Machida árið 2005.
Það er í raun ótrúlegt að Penn hafi ekki fært sig niður í fjaðurvigtina fyrr og spurningin er hvort hann geti gert einhvern usla í þeim þyngdarflokki. Hann hefur þó ekki unnið í fjögur ár, eða síðan hann sigraði Matt Hughes árið 2010, og tap gegn Edgar myndi að öllum líkindum þýða eftirlaun fyrir B.J. Penn.
Robert Drysdale keppir í fyrsta sinn í UFC
Robert Drysdale er einn allra besti BJJ kappi heims og vann meðal annars opna flokkinn á ADCC árið 2007 þar sem hann sigraði Marcelo Garcia með D’arce henginu, auk þess sem hann sigraði heimsmeistaramótið í -94 kílóa flokki árið 2005. Margir hafa því beðið eftir UFC frumraun hans með eftirvæntingu. Drysdale hefur unnið alla sex bardaga sína í fyrstu lotu með uppgjafartaki en þessir bardagar hafa þó allir verið gegn minni spámönnum. Spurningin er hvort þessi heimsklassa BJJ kappi sé nægilega fjölhæfur til að keppa við þá bestu í léttþungavigtinni í UFC.
Tveir ungir og efnilegir mætast: Justin Scoggins gegn Dustin Ortiz
Justin Scoggins er aðeins 22 árs gamall en hefur þrátt fyrir það unnið 9 atvinnumannabardaga í MMA og er með 21-0 bardagaskor í sparkboxi. Hann hóf að æfa karate þriggja ára og skín það í gegn í stílnum hans sem einkennist af óhefðbundnum spörkum. Hann býr einnig yfir góðum glímuhæfileikum og sýndi felluhæfileika sína í fyrsta bardaga sínum í UFC þar sem hann sigraði í fyrstu lotu. Fyrsti bardagi hans í UFC átti upprunalega að vera gegn Dustin Ortiz en breytt var um andstæðing á síðustu stundu af óljósum ástæðum.
Dustin Ortiz er 25 ára og æfir með Anthony Pettis og félögum hjá Roufusport og er sem stendur númer 13 í fluguvigtinni á styrkleikalista UFC. Hann er öllu þekktara nafn en Scoggins og hefur keppt við sterka fluguvigtarkappa á borð við Ian McCall og John Moraga, en tapaði reyndar fyrir þeim báðum. Hann hefur sigrað 13 bardaga og aðeins tapað þremur og því ljóst að bæði Scoggins og Ortiz eru á uppleið, óháð því hvernig þessi bardagi fer.
