![](https://i0.wp.com/mmafrettir.is/wp-content/uploads/2020/11/EmbKpJoU0AAIkrt.jpeg?resize=696%2C392&ssl=1)
Með Islam Makhachev frá vegna sýkingar hefur Paul Felder samþykkt að stíga upp og mæta Rafael dos Anjos í aðalbardaga kvöldsins á UFC Vegas 14 næsta laugardagskvöld.
UFC staðfesti bardagann milli dos Anjos og Felder í kjölfarið á Twitter-færslu sem Brett Okomoto, fréttamaður hjá ESPN, birti í gærkvöldi. Bardaginn verður háður í 155 punda léttvigt og verður fimm lotur.
Felder hefur síðustu vikur verið að undirbúa sig fyrir keppni í þríþraut og kemur því til leiks í góðu standi þrátt fyrir aðeins fimm daga fyrirvara. Felder átti upphaflega að lýsa bardögum helgarinnar en verður þess í stað í búrinu í aðalbardaga kvöldsins.
Felder ætlar greinilega að halda eitthvað áfram með feril sinn en áður hafði hann gefið það í skyn að núna væri kominn tími til að hengja hanskana á hilluna. Eftir mjög jafnan og spennandi bardaga sem tapaðist gegn Dan Hooker í febrúar á þessu ári sagði kappinn í viðtali eftir bardagann að honum þætti líklegt að núna væri þetta komið gott.
Í þremur síðustu bardögum sínum hefur Felder sigrað James Vick og Edson Barboza en látið í minni pokann fyrir Dan Hooker eins og áður segir.
Enn hefur ekkert heyrst frá Felder sjálfum um hvort hann sé mættur aftur í léttvigtina af fullum þunga eða hvort þetta sé leikur sem verði ekki endurtekinn.