Reynsluboltinn Rashad Evans tilkynnti fyrr í kvöld að hann væri hættur. Evans leggur hanskana á hilluna eftir 14 ára feril.
Hinn 38 ára Rashad Evans er nú formlega hættur í MMA. Þetta tilkynnti hann í þætti Ariel Helwani fyrr í kvöld. Evans var léttþungavigtarmeistari UFC eftir sigur á Forrest Griffin á UFC 92 árið 2008 en tókst ekki að verja beltið. Þá var hann sigurvegari í 2. seríu The Ultimate Fighter í þungavigt þrátt fyrir að vera bara 180 cm á hæð. Evans var lengst af í léttþungavigt en lauk ferlinum í millivigt. Ferill Evans endaði ekki vel en hann tapaði síðustu fimm bardögum sínum.
Evans barðist 23 bardaga í UFC og á metið yfir flesta bardaga í léttþungavigt UFC, 20 talsins, ásamt Ryan Bader. Þá var hann í þriðja sæti yfir flesta sigra (13 talsins) í léttþunavigt, þriðja sæti yfir flest rothögg (6) í léttþungavigtinni og á metið yfir flestar fellur í léttþungavigtinni (50).
