UFC staðfesti fyrr í kvöld titilbardaga Robert Whittaker og Israel Adesanya í millivigt. Bardaginn fer fram þann 5. október en staðsetning er óljós.
UFC hélt blaðamannafund fyrr í kvöld í Las Vegas þar sem næstu stóru bardagar voru kynntir. Þar var bardagi Robert Whittaker og Israel Adesanya staðfestur.
Robert Whittaker er ríkjandi millivigtarmeistari en hefur ekki barist síðan hann sigraði Yoel Romero í júní 2018. Whittaker átti að mæta Gastelum í febrúar en þurfti að hætta við bardagann samdægurs vegna kviðslits. Gastelum og Adesanya börðust því um bráðabirgðartitilinn í apríl þar sem Adesanya sigraði í frábærum bardaga.
Beltin verða nú sameinuð þann 5. október þegar Whittaker mætir Adesanya á UFC 243 en ekki er vitað hvar bardagakvöldið fer fram. Talið er að bardaginn gæti farið fram í Ástralíu enda Whittaker Ástrali og Adesanya búið í Nýja-Sjálandi frá 11 ára aldri.
