Sunna Rannveig Davíðsdóttir er nú á góðum batavegi og nálægt fullum bata. Sunna hefur glímt við handarmeiðsli síðan í fyrra og fer fljótlega að geta hafið æfingar á fullu.
Sunna Rannveig vann báða bardaga sína í fyrra í Invicta bardagasamtökunum. Eftir sigurinn á Kelly D’Angelo i júlí greindi Sunna frá handarmeiðslum sínum. Eftir nánari skoðun kom í ljós að hún yrði frá vegna meiðslanna í nokkra mánuði.
„Þetta er bólga í beininu á handarbeininu en þetta gerðist sem sagt í bardaganum gegn Mallory Martin [í mars] og síðan þá hefur verið mikið álag á höndinni í langan tíma. Ég er búin að vera sködduð síðan og tímabært að taka smá hvíld,“ sagði Sunna við MMA Fréttir í ágúst.
Núna er hún orðin fær um að setja meira álag á höndina og hefur endurhæfingin gengið vel samkvæmt heimildum MMA Frétta. Í febrúar stefnir hún á að geta kýlt af alefli með hægri höndinni og ef höndin ræður við álagið getur hún farið að leita að næsta bardaga.
Næsta bardagakvöld Invicta FC fer fram nú í janúar en næstu viðburðir þar á eftir fara fram í mars og maí.
